Kurríkulu siénsia natural no matemátika ne’ebé hahú implementa iha tinan 2015, Iha mestre/a barak mak lamenta katak sidauk toman oinsá uza rekursu no adapta ho pedagojia foun ne’ebé hatuur iha kurríkulu refere. Siénsia no matemátika ne’ebé ezije mestre/a sira hanorin ho pratika ka halo esperimentu beibeik iha prosesu aprendizajen. Maibé iha realidade, mestre/a sira sidauk iha esperiénsia kona ba hanorin ho pratika. Difikuldade ida mos mestre/a enfrenta maka laiha ekipamentu no material hodi hala’o pratika. Ho razaun hirak nee maka KNTLU halo formasaun hodi tulun mestre no mestra sira hodi responde ba difikuldade sira ne’ebé durante nee sira hasoru iha prosesu aprendizajen.
Formasaun ne’e hala’o iha Escola Sekundáriu Gerál Publica de Suai(ESGPS) durante semana ida nia laran no hetan prezensa bainaka espesiál Exelénsia Ministru Edukasaun Juventude no Desportu(MEJD) Sr. Armindo Maia Phd. MEJD Senti kontente no hato’o obrigadu boot ba UNESCO Jakarta ne’ebé liu husi Komisaun Nasional Timor Leste ba UNESCO(KNTLU) hodi inisiativa no servisu hamutuk ho (MEJD) hodi fo oportunidade no kria kondisaun atu bele fo formasaun ba ita nia mestra/a sira iha primeira no Segundo siklu liuliu partikularmente iha area siénsia no matemátika.
Atividade ba formasaun ne’e halao hela iha munisípiu rua maka hanesan Munisípiu covalima, viqueque ho loron ne’ebé hanesan hahú husi loron 4 Abril to loron 8 Abril 2022 no formador sira mai husi Profesór no Profesora sira iha Area Matemátika no Sensia. no tuir trájiku programa Siénsia KNTLU nian sei hala’o tan iha munisípiu 11 mak hanesan Dili, Aileu, Ainaro, Baukau, Bobonaru, Ermera, Lautem, Liquesa, Manatutu, Manufahi no RAEO ho total partisipante mestre/a sira hamutuk 1223 ne’ebé maka partisipa iha Formasaun nee.
Objetivu prinsipál husi formasaun ne’e atu hasa’e diak liu tan mestre/a sira nia koñesimentu jerál iha konteúdu siénsia natural no matemátika. Nomos lori mestre/a sira bele kompriende metodolojia no estratéjia sira hanorin ho pratika dixiplina siénsia natural no matemátika.
Formasaun nee rasik partisipa husi Ministru Edukasaun Juventude no Desportu(MEJD), Prezidente INFORDEPE, Sekretáriu Ezekutiva Interinu KNTLU, Superintendente Edukasaun Munisípiu Covalima, Diretór Eskola (ESGPS), Mestre/a husi EP Suai Villa, Diretór Edukasaun Munisípiu Covalima no mos UNESCO Jakarta via online. Atividade formasaun ne’e rasik hetan suporta husi Governu Japaun, UNESCO Jakarta, Ministériu Edukasaun Juventude no Desportu no Komisaun Nasional Timor Leste ba UNESCO.
