Manatutu, 29 Novembru 2023. Komisaun Nasionál Timor-Leste ba UNESCO (KNTLU) ninia divizaun Siénsia (Sentru Estudu Siénsia no Matemátika-SESIM) organiza eventu anuál Loron Mundial Siénsia no Matemátika hodi promove siénsia no matemátika ba estudante no mestre sira hosi nivel pre-sekundária no sekundária no Ensinu Superior. Loron mundiál siénsia no matemátika nee selebra iha loron 10 Novembru kada tinan.
KNTLU /SESIM organiza ona eventu ida-ne’e hahú hosi tinan 2014 to’o 2022 ho suporta másimu hosi Conoco Philips no iha tinan 2020 to’o 2023 hetan suporta hosi kompañia SANTOS nomos UNESCO office iha Jakarta. Ekipa susesu organiza ona eventu selebrasaun loron mundiál siénsia no matemátika hahú iha tinan 2015 to’o 2019 liu hosi atividade akampamentu iha munisípiu sira hanesan Aileu, Baucau, Ermera no Manufahi ne’ebé hetan partisipa hosi estudante sira hosi eskola pre-sekundária to’o nivel Ensinu Superior. Depois tinan tolu ikus selebra de’it iha munisípiu Dili ho razaun tanba pandemia COVID iha tinan 2020 & 2021 no tinan 2022 depois COVID, tinan ida-ne’e mak foin konsege fali selebra loron Mundial Siénsia no Matemátika iha munisípiu Manatutu iha ESGP Kayrala.
Reprezentante Santos Country Manager Sr. Elizabet Gomes hateten Santos haksolok tebes bele mai partisipa fali Selebrasaun Loron Mundiál Siénsia no Matemátika ba 2023 ohin kompleta tinan 10 Santos sai nudar patrosinadór prinsipál ba eventu ida ne’e, rekursu minarais ne’ebé Santos ajuda dezenvolve iha Timor Leste liu husi projetu Bayu-Undan sai nudar rekursu ida importante ba rai ida ne’e, ho nune ami fiar katak rekursu humanu mak rekursu ne’ebé importante liu hotu, hanesan Edukasaun liu liu Siénsia no Matemátika mak pillar ne’ebé importante tebes ba Santos entre mós dezenvolvimentu rekursu humanu Timor Leste nian iha setór Edukasaun, ami sente orgullu tebes atu sai asosiadu iha programa ida ne’e importante no signifikativu teb-tebes hanesan ida ne’ebé mak fó benefísiu ba estudante sira husi ensinu pre-sekundáriu to ba Ensinu Superior iha rai laran tomak parabens ba grupu eskola sira hotu ne’ebé eskluidó nu’udar manan nain hodi partisipa iha eventu ida ne’e. ami hein katak ita bo’ot sira sei nafatin uja matenek no abilidade ne’ebé imi aprende ona hodi fo benefísiu ba maluk sira seluk, Ami agradese ba Komisaun Nasionál Timor Leste ba UNESCO ba parseira produtiva ne’ebé ita estabelese ona to ohin loron.
Atividade ida ne’e hetan partisipasaun hosi munisípiu sira, mak hanesan Bobonaru, Dili, Lautem no Viqueque ho total maizumenus 160 estudante ho mestre. Partisipante sira neebe maka marka prensa mak hanesan grupu manán-na’in ne’ebé konsege tuir kompetisaun hakerek tópiku siénsia no matemátika ne’ebé kompostu hosi estudante ensinu báziku siklu 3, sekundária no universidade sira. Komemorasaun ida-ne’e mak estudante sira bele mai hamutuk hodi aprende no fahe koñesimentu ba malu kona ba Siénsia no Matemátika durante loron 2 nia laran.
Objetivu husi eventu ida ne’e Atu promove siénsia no matemátika ba estudante sira nu’udar area ne’ebé importante tebes atu aprende iha futuru no oportunidade ba estudante sira hosi ensinu pre-sekundáriu, sekundáriu, mestre sira no universitáriu sira atu aprende no dezenvolve atividade prátika iha area siénsia no matemátika no fahe sira-nia koñesimentu ba nia maluk sira.
Partisipa husi Presidente Infordepe, vice presidente Infordepe, Sekretáriu Ezekutiva (KNTLU) reprezentante Ministériu Edukasaun Diretór Curriculum, UNESCO antena office, reprezentante country manager Santos, reprezentante administradór Manatutu, estudante no mestri sira.
Tinan ne’e, komemorasaun loron mundiál siénsia no matemátika hala’o iha Eskola Sekundária Jerál Kayrala, munisípiu Manatuto, hahú hosi data 27 – 30 Novembru 2023 no Hetan Suporta másimu husi Kompañia SANTOS.
