PHNOM PENH, CAMBODIA – Delegasaun estudante inovadór husi Timor-Leste foin lalais ne’e konsege foti aas fali nasaun nia naran iha kantu internasionál liuhusi kompetisaun International Creativity and Innovation Award (ICIA) 2026, ne’ebé hala’o iha Phnom Penh, Cambodia, husi loron 24 to’o 26 Abríl 2026.
Iha eventu prestíjiu ne’ebé halibur partisipante husi nasaun maizumenus 27 (Amérika Latina, Europa, Ázia, no Médiu Oriente), Timor-Leste hatudu ninia kapasidade iha área STEAM (Siénsia, Teknolojia, Enjeñaria, Arte, no Matemátika) liuhusi manán prémiu kategoria oioin, inklui kategoria prestíjiu Grand Award.
Prosesu Selesaun Rigorozu Partisipasaun ne’e mak rezultadu husi inisiativa Komisaun Nasionál Timor-Leste ba UNESCO (KNTLU), liuhusi Divizaun Siénsia, ne’ebé tinan-tinan selebra Loron Mundiál Siénsia no Matemátika (LMSM). Kompetisaun ne’e serve nu’udar odamatan ba estudante sira hodi hatudu sira-nia inovasaun hafoin liu husi selesaun ne’ebé rigorozu tebes ba finalista sira.
Susesu iha Kategoria Online Iha kompetisaun kategoria Online ne’ebé hala’o iha 11 Abríl 2026, Timor-Leste kompete ho nasaun sira hanesan Ejiptu, Jordánia, Turkia, Itália, Roménia, Méksiko, no Brazíl. Rezultadu mak:
- Medalla Osan-Mutin (Silver): ESGP Nú. 1 Baukau, ESGP Nú. 1 Likisá, no ESGP 4 de Setembru Viqueque.
- Medalla Bronze: ESGP Finantil Dili, EBC Dom Baumeta (Aileu), no EBC 3 Fatumeta (Dili).
Istória Foun iha Partisipasaun Direta (Onsite) Timor-Leste marka vitória boot liután iha kompetisaun direta iha Cambodia. Eskola EB Catolica St. Antonio Teulale Baukau sai protagonista liuhusi projétu “Estatístika Husi Resiklajen Oinsá Atu Buka Moda, Mediana No Média Husi Sasán Garaffa Matan, Paulitu Ai-Kesak No Gabus”. Projétu ne’e konsege lori fila prémiu tolu: Grand Award, Titanium, no mós tama iha Top 10 Challenge husi Minístru Ambiente Cambodia.
Alende ne’e, grupu seluk mós kontribui ho:
- Medalla Osan-Mutin (Silver): EBC Dom Baumeta (Aileu) ho projétu “Bioplastiku Ne’ebé Halo Iha Uma: Bikan/Kopi Ho Manu-Tolun Nia Kulit”.
- Medalla Bronze: EB Catolica St. Antonio Teulale Baukau ho projétu “Sekuénsia Númeru Mosu Iha Tais”.
Rekoñesimentu ba Manorin (Profesór) Iha kompetisaun ne’e, la’ós de’it estudante mak manán, maibé kbiit pedagójika profesór Timor nian mós hetan rekoñesimentu mundiál. Profesór Zelia Alves da Cruz husi EBC Dom Baumeta 1, 2, 3 Suku Liurai, Aileu-Vila, konsege manán prémiu Grand Award Top 3 “Teach Me Award”. Prémiu ne’e fó bazeia ba ninia kapasidade esesionál hodi esplika konseitu kompleksu sira ho modu simples no edukativu.
Parabéns ba delegasaun hotu, ba KNTLU, no ba eskola sira ne’ebé lori ona fali vitória ida-ne’e ba ita-nia Rain Doben Timor-Leste!