Komisaun Nasionál ba UNESCO hamutuk ho membru Komité Nasionál Patrimóniu Kulturál Imateriál Timor-Leste (KOMNAS PKI TL) sira hotu, komemora Loron Nasionál Tais ba daruak, 14 DEZEMBRU 2023 ho Tema “Haburas Tais ba Ha’u Rain”
Iha ámbitu Komemorasaun ne’e, realiza atividade promosaun no sensibilizasaun oi-oin hanesan Kompetisaun Soru Tais ba foin-sa’e sira, Feira Tais no Artezanatu, Kompetisaun Dansa Tradisionál, Kompetisaun Poezia, no Sertame Kona-ba Tais. Objetivu husi atividade sira ne’e atu hasa’e koñesimentu ema Timor-oan hotu, liuliu foin-sa’e sira nian kona-ba tais. Nune’e mós divulgasaun informasaun ba uzu Tais nian ba ema hotu iha territóriu Timor-Leste no motiva Timor oan hotu-hotu atu promove Tais. Atividade sira ne’e, realiza durante Loron neen, hahú hosi loron 9 to’o 13 Dezembru 2023, ne’ebé hetan partisipasaun másimu hosi Soru-na’in munisípiu 12 no RAEOA, grupu artezanatu no estudante sira.
Iha Loron 14 Dezembru 2023 ne’ebé estabelese nu’udar Loron Nasionál Tais, Komité Nasionál PKI hahú ho Semináriu Nasionál Kona-ba Tais hodi ko’alia kona-ba Ezisténsia no Istória Tais, dezenvolvimentu Tais, Papél Sosiedade Sivíl nian ba prezervasaun no Promosaun Tais. Iha fatin hanesan membru sira KOMNAS PKI TL realiza mós Talk show kona-ba progresu implementasaun Salvaguarda Urjente ba Tais.
Iha parte lokraik realiza marcha ho Tais hosi Palácio Presidencial to’o Centro Convenções de Dili. Marcha refere partisipa direitamente hosi S.E. Ministru Komérsiu e Indústria Sr. Nino Pereira no S.E. Sekretáriu Estadu Arte no Kultura, Sr. Jorge Soares Cristóvão, inklui soru na’in, estudante, moradores, grupu Kulturál no Komunidade iha Dili.
Komemorasaun ne’e taka ho aprezentasaun kulturál, lansamentu livru Tais hosi Munisípiu Viquque, Manatuto no Ainaro, entrega prémiu ba manan na’in sira, konsertu múzika iha Centro Convenções de Dili.
