Komisaun Nasionál Timor Leste ba UNESCO (KNTLU) hala’o lansamentu ba livriñu (booklet) no vídeo tebe Tradisionál Timor Leste hosi munisípiu (7) mak hanesan Ermera, Ainaro, Aileu, Lautem, Viqueque, Baucau no Liquiça. Atividade ne’e hala’o iha suku eraulo aldeia olopana munisípiu Ermera hetan suporta apoiu finanseiru hosi UNESCO Paris liu husi servisu hamutuk KNTLU.
Programa ne’e hanesan programa ida hosi UNESCO Paris ne’ebé prezerva patrimóniu kulturál immaterial. Liu hosi servisu Divizaun Kultura KNTLU nian hala’o prezerva tebe tradisionál iha Timor Leste. Tebe tradisionál sira iha munisípiu ne’e dezde tempu uluk iha ona no agora hatutan ba jerasaun foun sira atu banati tuir tebe ne’ebé mak rai hela ba sira atu nune’e labele lakon persija prezerva halo dokumentasaun hanesan livriñu no vídeo. Tebe tradisionál nia signifika kuaze hanesan iha munisípiu (7) ne’e baibain sira uja hodi simu bainaka, halo uma lisan, halo servisu ruma hanesan sama hare no fai batar sira sempre uja tebe ne’e.
Sua Exelensia Sekretáriu Estadu Arte é Kultura Sr. Jorge Soares Cristavão hateten hodi governu nia naran apresia ba servisu KNTLU nian ne’ebé prezerva patrimóniu kulturál immaterial no kontinua promove ba mundu. Liu hosi servisu linhas ministerias no KNTLU persija atu identifika patrimóniu sira nebe’e maka ita bele halo prezervasaun kontinua rejistu mós ba iha UNESCO atu konsidera patrimóniu mundiál ne’ebé maka identidade ne’ebe origin mai hosi kedas ita nian bei’ala sira. Tanba ida ne’e maka ho dokumentasaun sira ne’e mak ita-nia servisu iha nivel internasionál atu halo promosaun ba prezervasaun liu hosi identidade tebe tradisionál ita nian.
Objetivu atu prezerva tebe tradisionál timor leste labele lakon liu hosi dokumentasaun livriñu (booklet) no vídeo atu nune’e jerasaun foun sira labele haluhan kultura tebe nian ne’ebé sira nia avo rai hela ba sira jerasaun foun sira bele hare no halo tuir no prezerva kultura tebe timor nian.
Atividade ne’e hetan partisipa másimu hosi Sua Exelensia Sekretáriu Estadu Arte é Kultura, Sekretáriu Ezekutivu KNTLU, reprezentante Presidente autoridade ermera, administradór postu letefoho, komandante polísia postu letefoho, pontu fokal kultura ermera, autoridade lokál xefe suku, aldeia, lia na’in, estudante no komunidade sira.
