Atsabe, 10 Outubru 2023 Komité Nasionál ba Patrimóniu Kulturál Imateriál Timor-Leste (KOMNAS PKI TL) liu-hosi Ministériu Komérsiu no Indústria no Komisaun Nasionál Timor-Leste ba UNESCO realiza Treinamentu Diversifikasaun ba Produtu hosi Tais, iha Suku Malabe, Postu Administrativu Atsabe, Munisípiu Ermera.
Atvidade treinamentu ne’e parte ida hosi Planu Salvaguarda Urjente ba Tais 2022 – 2025, hafoin Timor-Leste inskreve tiha nia elementu kulturál “Tais, Téxtil Tradisionál” iha Lista Patrimóniu Kulturál Imateriál UNESCO nian ne’ebé Presija Salvaguarda Urjente. Objetivu hosi treinamentu ne’e atu kapasista soru-na’in sira nia abilidade téknika no koñesimentu kona-ba divesifika Tais ba produtu utilidade sira seluk hanesan Pasta, Sakola, Karteira, Sapatu no seluk tan, tuir demanda hosi nesesidade merkadu nian.
Treinamentu Diversifikasaun ba Produtu hosi Tais iha Suku Malabe ne’e, hetan partisipasun máximu hosi soru na’in ne’ebé halibur-an iha Grupu Kultura Hamrik Metin, barak liu foinsa’e feto ho idade produtivu ne’ebé durante ne’e ajuda inan sira soru Tais iha sira nia atividade lor-loron nian. Partisipante iha treinamentu ne’e hamutuk na’in rua nulu (20), feto hamutuk 17 no mane na’in 3. Durante loron lima hosi 09 Outubru to’o 13 Outubru 2023, formandu sira sei hetan asistensia tutoriál ba diversifikasaun Tais hosi formadora experiente kona-ba diversifikasaun produtu téxtil (li-liu Tais), Sra. Elda Ferreira de Oliveira.
Iha aberuta ba treinamentu ne’e, Xefe Aldeia Malabe Sr. Carlos de Deus agradese no sinti orgullu ba oportunidade ne’ebé mak KOMNAS PKI TL fó ba komunidade iha Atsabe hodi sai benifisiáriu ba implementasaun Planu Salvaguarda Tais, atu hasa’e koñesimentu soru na’in sira nian kona-ba diversifikasaun produtu Tais, “Hau reprezenta xefe suku Malabe senti kontenti no orgullu tamba bele realiza treinamentu ne’e iha mai nia suku, ami agradese ba Ministeriu Komérsiu no Indústria no Komisaun Nasionál Timor-Leste ba UNESCO tamba bele hili Atsabe hanesan fatin ba treinamentu ne’e ”, Iha fatin hanesan Xefe aldeia ne’ebé reprezenta Xefe Suku Malabe enkoraja mós partisipante sira atu aproveita oportunidade ne’e ho dia’k atu lori Tais Atsabe ba oin
Realizasaun ba atividade ne’e hetan apoiu finanseiru hosi Fundu Internasionál ba Patrimóniu Kulturál UNESCO (ICH Fund) no Ministériu Komérsiu no Indústria.
