Aileu Suku Liurai Ekipa Devizaun Komunikasaun no Informasaun husi Komisaun Nasionál Timor Leste ba UNESCO (KNTLU) halo verifikasaun ba dadus sasan antiga hodi registu iha Memoria do Mundo atu Promove no Salvaguarda Patrimóniu Mundial Dokumentál.
Dadus hirak ne’e rekoila nanis ona husi ekipa tekniku ne’ebe servisu makas tun iha terenu hodi foti dadus hirak ne’e mak hanesan belak, surik, dima no seluk seluk tan, total ba dadus sasan antiga iha suku Liurai aldeia 8 hamutuk 60 dadus ne’ebe ekipa tekniku rekoila durante fulan 2 nia laran. Tan ne’e ekipa tun hodi verifika durante loron 2 no halao intervista badak no foti fotografia kona ba sasan antiga sira ne’e no nain ba sasan sira ne’e deklara katak sasan antiga hirak ne’e desde uluk tempu avo beala nia iha ona no agora rai hela iha uma lisan.
KNTLU liu husi Devizaun Komunikasaun no Informasaun halao’o aprezentasaun no verifikasaun dadus Patrimóniu Mundial Dokumentál ba autor ba sasan antiga sira ne’e no halao’o Semináriu Promove no Salvaguarda Patrimóniu Mundial Dokumentál iha sede suku Liurai atu fahe tutan informasaun kona ba sasan antiga hirak ne’e persija salvaguarda atu nune’e labele hetan estragus persija próteze ou valorija sasan hirak ne’e hodi rejistu dadus ba iha arkivu antiga sira. Programa ida ne’e hanesan desiminasaun informasaun husi Ministeriu Ensino Superior, Siensia no Kultura (MESSK) ne’ebé liu husi servisu KNTLU.
Alende aprezenta dadus no semináriu ne’e Sefi Suku Liurai hateten senti kontenti no agradese tamba husi programa Ministeriu Ensino Superior, Siensia no Kultura (MESSK) liu husi servisu KNTLU nian bele fahe ona informasaun klean ba komunidade sira kona ba Salvaguarda Patrimóniu Mundial Dokumentál hodi registu iha Memoria do Mundu no husu ba komunidade atu rona didiak informasaun hirak ne’e tamba oportunidade diak atu Salvaguarda Patrimóniu Mundial Dokumentál ba sasan antiga sira ne’e hodi bele registu no labele hetan estragus husi dezastre ruma no ba komunidade sira ne’ebe partisipa bele fahe tutan informasaun hirak ne’e ba inan, aman ou avo sira ne’ebe labele partisipa tamba kondisaun.
Objetivu husi atividade ne’e atu halo verifikasaun lolos ba iha dadus ne’ebe ekipa KNTLU rekoila katak sasan hirak ne’e iha duni no hanesan foti iha tereinu atu partilia informasaun klean liu tan ba komunidade sira ne’ebe menus informasaun kona ba próteze ou valorija sasan antiga hirak ne’e persija salvaguarda. Atividade ne’e partisipa husi Sefi Suku, sefi aldeia no komunidade sira iha suku Liurai.
