Jullu 2026 – Komisaun Nasional Timor-Leste ba UNESCO (CN-UNESCO), liuhosi Projetu BRIDGE Timor-Leste, ne’ebé hetan apoiu husi Korea National Commission for UNESCO (KNCU), ofisialmente lansa implementasaun Programa Eskola Enuma iha Sekolah Komunitária de Aprendizagem (SKA) tolu iha Timor-Leste. Inisiativa ida-ne’e nu’udar parte husi esforsu CN-UNESCO atu promove edukasaun dijital ne’ebé inkluziva, inovadora no ho kualidade, liuliu ba komunidade sira iha área remota.
Lansamentu programa hala’o iha fatin no data hanesan tuir mai:
- SKA Valor Lautém, Munisípiu Lautém – 30 Juñu 2026
- SKA Laclubar Leo-Telu, Munisípiu Manatuto – 6 Jullu 2026
- SKA Naroman Leno Hatulia, Munisípiu Ermera – 10 Jullu 2026
Programa Eskola Enuma introdús plataforma aprendizajen dijital inovadór ida ne’ebé fó oportunidade ba estudante no membru komunidade sira, liuliu hirak ne’ebé abandona eskola no estudante ativu sira, atu hametin sira nia habilidade iha lian Inglés no matematika bazika. Ho sistema aprendizajen personalizadu, estudante ida-idak bele aprende tuir sira nia ritmu no nivel koñesimentu rasik liuhosi konteúdu interativu ne’ebé disponivel iha tableta.
Atividade lansamentu ne’e partisipa husi Diretor Edukasaun Munisipál, autoridade lokal sira, estrutura no manorin husi SKA ida-idak, Koordenadora Divizaun Edukasaun CN-UNESCO ho nia ekipa, fasilitadór sira, no reprezentante komunidade lokal. Partisipante sira reafirma sira nia apoiu no kompromisu atu garante implementasaun programa ne’e bele lao ho efetivu no sustentável iha nivel lokal.
Nu’udar parte husi implementasaun programa, CN-UNESCO entrega tableta ba SKA tolu atu fasilita Aula Enuma no garante asesu ba plataforma aprendizajen dijital. Depois entrega ekipamentu, estudante sira halo Placement Test (Teste Kolokasaun) atu identifika sira nia nivel dahuluk iha lian Inglés. Rezultadu teste ne’e sei uza husi sistema Enuma atu adapta automaticamente konteúdu aprendizajen tuir kapasidade no nesesidade estudante ida-idak.
Implementasaun Programa Eskola Enuma liuhosi Projetu BRIDGE Timor-Leste reflete kompromisu CN-UNESCO atu promove edukasaun inkluziva, inovadora no ho kualidade. Liuhosi utilizasaun teknolojia dijital, programa ida-ne’e kontribui atu hametin literasia dijital, hasa’e kapasidade estudante sira iha lian Inglés no matematika bazika, no loke oportunidade ba aprendizajen durante moris tomak, liuliu ba komunidade sira iha área remota Timor-Leste.
CN-UNESCO hato’o apresiasaun ba Korea National Commission for UNESCO (KNCU), parseiru implementasaun hotu, autoridade lokal, manorin sira no komunidade sira ne’ebé fó apoiu ba realizasaun programa ida-ne’e. Kooperasaun no kompromisu husi parseiru sira sai fator importante atu garante sustentabilidade no sucesso implementasaun Programa Eskola Enuma.
Liu hosi inisiativa ida-ne’e, CN-UNESCO espera katak Programa Eskola Enuma bele sai hanesan modelu ida ba inovasaun edukasaun dijital iha Timor-Leste, ne’ebé bele hasa’e kualidade aprendizajen, hametin kapasidade estudante no komunidade sira, no kontribui ba dezenvolvimentu rekursu umanu atu realiza objetivu dezenvolvimentu sustentável iha futuru.