Díli, 13 Jullu 2026 – Estudante sira husi CEBC no Eskola Sekundáriu St. António Teulale, Baucau-Vila, hamutuk ho sira nia manorin, remata ona preparasaun ikus iha Knua Prátika Sentrál Siénsia no Matemátika, ne’ebé lokaliza iha Eskola 30 de Agosto, Comoro, Díli, molok sira viajen ba Science Technology Innovation Creativity Konference (STICK) 2026 iha Kuala Lumpur, Malaysia.
Preparasaun ida-ne’e fó énfase ba hametin estudante sira nia prontidaun atu aprezenta projetu inovasaun sira ne’ebé buka solusaun ba dezafiu no problema reál sira ne’ebé komunidade no nasaun hasoru. Liuhosi diskusaun no servisu hamutuk, estudante sira aperfeiçoa sira nia ideia projetu, aplika koñesimentu siéntífiku, no dezenvolve solusaun inovadór ho kreatividade no hanoin kritíku.
Durante preparasaun ne’e, estudante sira mós simu orientasaun husi formadór no manorin sira husi Eskola Sekundáriu St. António Teulale kona-ba téknika aprezentasaun, komunikasaun efetivu, no oinsá responde ho konfiansa ba pergunta sira husi júri no partisipante internasionál sira. Aleinde ne’e, Ekipa Divizaun Siénsia husi Komisaun Nasional Timor-Leste ba UNESCO (CN-UNESCO) guia estudante sira atu integra Inteligénsia Artifisial (AI) ba sira nia projetu hodi hasa’e inovasaun no relevánsia pratika husi ideia sira ne’ebé dezenvolve.
Atividade preparasaun ida-ne’e importante tebes atu hametin estudante sira nia kapasidade iha área STEAM (Siénsia, Teknolojia, Enjenharia, Arte no Matemátika). Atividade ne’e mós promove hanoin kritíku, servisu hamutuk, kapasidade peskiza, kreatividade no rezolusaun problema sira, ne’ebé sai kompeténsia importante ba gerasaun inovadór sira iha futuru.
Delegasaun Timor-Leste sei viajen ba Kuala Lumpur iha 15 Jullu 2026 atu partisipa iha STICK 2026, konferénsia internasionál ne’ebé halibur estudante, investigadór, edukadór no inovadór sira husi nasaun oioin. Partisipasaun ida-ne’e sai oportunidade boot ida ba estudante Timoroan sira atu hatudu sira nia kapasidade, fahe esperiénsia no koñesimentu ho partisipante internasionál sira, no reprezenta Timor-Leste ho dignidade iha palcu mundiál.
Komisaun Nasional Timor-Leste ba UNESCO (CN-UNESCO) hato’o parabéns no fó hakbiit ba estudante no manorin sira hotu ne’ebé sei reprezenta Timor-Leste iha STICK 2026. Partisipasaun ida-ne’e hatudu kompromisu Timor-Leste atu promove siénsia, teknolojia, inovasaun no kreatividade, no prepara jovem sira atu sai lider no inovadór ba dezenvolvimentu sustentável nasaun.
CN-UNESCO hakarak estudante sira hotu hetan susesu iha STICK 2026 no espera katak sira nia rezultadu no inovasaun sei inspira jovem Timoroan seluk atu kontinua aprende, kria inovasaun no kontribui ba dezenvolvimentu Timor-Leste.