Maliana, 24 Setembru 2024. Komité Nasionál ba Patrimóniu Kulturál Imateriál Timor-Leste (KOMNAS PKI TL) liu-hosi Ministériu Komérsiu no Indústria no Komisaun Nasional Timor-Leste ba UNESCO realiza formasaun tékniku kona-ba jestaun negósiu “Ba grupu soru Na’in no grupos Indústria artesanatos Tais, iha Munisipiu Bobonaro.
Atividade treinamentu ne’e parte ida hosi planu Salvaguarda Urjenti ba Tais 2022-2025, hafoin Timor-Leste inskreve tiha nia elementu kultural “Tais, (Têxtil Tradisional) iha lista Patrimóniu kulturál Imateriál UNESCO nian ne’ebé presiza salvaguarda Urgenti.
Objetivu husi treinamentu ida ne’e atu hasa’e kapasidade partisipante sira nian ba iha planu finansiamentu produtu Tais iha merkadu.
Treinamentu jestaun negósiu ne’e hetan partisipasaun máximu hosi sira Soru na’in sira iha Munisípiu Bobonaro. Partisipante iha treinamentu ne’e hamutuk na’in (20), feto hamutuk 18 no mane na’in 2. Durante loron lima husi 23-28 Outubru 2024, partisipante sira hetan matéria bázika kona-ba kontabilidade no planu finansiamentu ba negosiu husi formandu na’in rua husi Instituto Apoio Desenvolvimentu Empresarial IADE no formandu na’in ida husi Diresaun Nasional Indústria Manufatureira MCI.
Iha treinamentu ba loron ikus nian, reprezentante sira husi Autoridade Munisipiu nian hato’o sira nia apresiasaun ba inisiativa husi programa ne’ebé realiza husi Direção Nasionál da Indústria Manufatureira MCI, Komisaun Nasionál Timor-Leste ba UNESCO ne’ebé kapasita ona grupu Soru Na’in sira iha área jestaun nian liu-liu ba grupu sira ne’ebé iha hanoin hakarak atu kria empresa rasik, fortifika estrutura grupu hodi dezenvolve rede Soru iha Munisipiu Bobonaro, hasa’e kualidade no kuantidade produtu Tais, no empodera ekonomia feto iha Munisipiu ne’e rasik. Partisipante sira husu mos ba Governu no ajensia Internasionál sira atu kontinua suporta programa ida ne’e ba oin no envolve mos sira seluk ne’ebé seidauk hetan oportunidade nune’e sira ne’ebé soru Tais bele hetan hotu koñesimentu hodi jere di-diak sira nia planu finansiamentu ho efetivu nune’e bele aumenta kuantidade produtu Tais ho kualidade Dia’k.
Realizasaun ba atividade ne’e hetan apoiu finansiamentu hosi Fundu Internasional ba Patrimoniu Kultural Imateriál UNESCO (ICH Fund).
