Ami orgullu atu fahe ho imi susesu balu husi Komisaun Nasional Timor-Leste ba UNESCO (KNTLU) nia divizaun Siénsia (SESIM) iha inísiu fulan Jullu nian. KNTLU-SESIM organiza semináriu “Strengthening the Knua Prátika and building future astronomers for Lorosa’e land (Timor-Leste),” no tema ba semináriu ida-ne’e mak Dezenvolve Edukasaun Astronomia ba futuru Astrónomu no sientista iha Timor-Leste. Formasaun ne’e foka liu ba manorin fízika nivel ensinu sekundáriu husi munisipiu sanulu-resin-tolu (13).
![](https://natcomunesco.gov.tl/wp-content/uploads/2024/07/AY1A4404-transformed-1024x683.jpeg)
Formasaun ida-ne’e mós nu’udar kooperasaun ida-ne’ebé KNTLU halo ho Institut Teknologi Sumatera (ITERA) tanba hetan fundus husi International Astronomical Union – Office of Astronomy for Development (IAU-OAD). Formasaun ne’e realiza durante loron lima (5) iha loron 1-5 Jullu 2024 ba formandu hamutuk na’in 30 ne’ebé kompostu husi professor rua nulu-resin-haat (24) no ekipa SESIM nain 6.
Objetivu husi formasaun astronomia nian mak hanesan:
- Hasa’e koñesimentu no abilidade manorin sira iha Timor-Leste kona-ba astronomia liga ho matenek lokál no area sira seluk liga ho siénsia.
- Hasa’e mestre nia konfia-an hanorin tópiku astronomia hodi kria rasik sira-nia modelu no atividade sira.
- Kria kolaborasaun entre manorin sira husi munisipiu seluk no Knua Prátika (KP) atu fahe esperiénsia no idea sira.
KNTLU-SESIM iha esperansa boot ba formandu sira atu fahe fali siénsia sira-ne’ebé, sira aprende ona, ba fali sira-nia estudante sira iha ida-idak nia eskola. Ekipa SESIM sente forte liután tanba bele kolabora hodi habelar tan koñesimentu interesante sira liga ho astronomia ho mestre sira. Hamutuk ita bele kontribui ho forma oin-oin hodi suporta ba kualidade edukasaun siénsia iha Timor-Leste.
Atividade interesante balu ne’ebé aprende iha workshop ba loron 5 nia mak hanesan, aprende kona-ba konseitu jerál Astronomia, inklui istória no matenek lokál astonomia nian; meteorologia, janela kalohan, website no applikasaun android (telefone) kona-ba previzaun tempu; kria modelu relójiu Loro, hatene loron ne’ebé Timor-Leste laiha lalatak (no shadow day); aprende koordenada sira iha raiklaran no espasu, ho uza Sextant, inklonometru no GPS; faze fulan; relasaun entre fulan no mare (meti maran no been); utiliza teleskópiu hodi observe astru sira iha lalehan, pontu metan (manchas escuras), Mapa lalehan (Sky map), astrophotography, poluisaun naroman; loro-mate no fulan-mate, ho website sira hodi hatene kona-ba loro-mate no fulan-mate; nst.
Espera katak estudante husi eskola ne’ebé mak partisipa iha formasaun ne’e sei hetan benefísiu husi tópiku sira-ne’ebé nia mestre sira aprende ona.