Dili-Hera, 14-18 Jullu 2025 – Komisaun Nasional Timor-Leste (KNTLU) iha kolaborasaun ho UNESCO Jakarta no Fakuldade Enjinaria, Siensia no Teknolojia (FECT) iha UNTL Hera, hala’o atividade formasaun kona-ba métodu VISUS (Inspesaun Vizual ba Definisaun Estratejia Atualizasaun Seguransa).
Inisiativa ida-ne’e, ne’ebé finansia husi Programa Partisipasaun UNESCO (PP), serve hanesan projetu pilotu ida ho objetivu atu hala’o avaliasaun seguransa ne’ebé lalais no sientifikamente bazeia ba infraestrutura eskola iha Timor-Leste. Projetu ne’e sei avalia eskola 50 iha munisípiu Dili no Aileu.
KNTLU mós servisu hamutuk ho Universidade Udine (Italia), ne’ebé sei suporta dezenvolvimentu plataforma dijitál VISUS Timor-Leste nian, fornese formasaun akadémika online, halo análize dadus, no prepara relatóriu VISUS individuál ba eskola ida-idak ne’ebé avalia tiha ona.