Divizaun Siénsia no Matemátika iha nia atividade prinsipal sira maka hanesan;

1. Komemorasaun loron mundiál siénsia no matemátika
2. Knua Prátika iha munisipiu sira.
3. Diseminasaun Informasaun Kona-Ba Unesco Global Geopark
4. Treinamento Astronomia

1. Komemorasaun loron mundiál siénsia no matemátika
Organizasaun Nasoins Unidas ba Edukasaun, Siénsia, Kultura, Komunikasaun   no Informasaun (UNESCO) deklara ona iha rezolusaun 20/ UNESCO 31C kona-ba komemorasaun loron mundiál siénsia (LMS) iha loron 10 fulan Novembru kada tinan. Eventu ida-ne’e konsidera iha papél signifikativu tanba bele promove siénsia ba komunidade globál. Alende ne’e, introdús mós ba komunidade papél   importante balu husi peskiza sientífiku   liga ho desizaun   lideransa nian.   Nune’e, komemorasaun Loron Mundiál Siénsia (LMS) mak nu’udar oportunidade   di’ak   atu involve komunidade no akademista sira hodi halo diskusaun no debate iha públiku kona-ba kestaun sientífiku balu liga ho problema globál. Tema ba Komemorasaun ba tinan ne’e mak “Globál Science for Globál Well-being” Siénsia Globál ba moris di’ak globál.

Siénsia dezempeña nia papél fundamentu atu hasa’e rahun-di’ak (bem-estar) globál, liuhosi dezenvolve solusaun ba dezafiu sira-ne’ebé mundu enfrenta. Siénsia globál mak fundamentu atu alkansa rahun-di’ak globál. Liu husi kolaborasaun, sientista sira bele dezenvolve solusaun sira-ne’ebé sustentável ba problema mundiál nian, hanesan saúde públiku, alterasaun klimátika, seguransa ai-han no oportunidade ekonómika sira. Timor-Leste nu’udar Nasaun ida ne’ebé mós hola parte iha mundu, presiza prepara ninia jerasaun foun atu kompete no Kolabora hodi buka solusaun ba problema globál sira-ne’ebé afeta mós ba ema nia moris di’ak.

2. Knua Prátika iha munisipiu sira.

Programa pilotu KP sei hala’o iha munisípiu 10; mak hanesan Ainaro (EBC. Venancio Ferraz), Baucau (EBC. No.1 Vila Nova), Bobonaro (EBC. No. Maliana), Covalima (Suai) EBC. 1,2,3 Ladi, Dili (EBC. 30 de Agoasto), Manatuto (EBC. Vasco da Gama), Viqueque (EBC. Cabira oan), Manufahi (EBC. Babulo), Lautem (ESG. Nino Conis Santana, Lospalos), Liquiça (ESG. Liquica Huu Isso Lara Iso).

Fatin ba KP mak nu’udar espasu iha atu rai sasán hosi rezultadu Grupu Siénsia no Matemátika (GSM), Grupu Trabalho Professores, no atividade seluk ne’ebé liga ba área rua ne’e.  Fatin ne’e tenke iha eskola laran ka besik eskola ida. Sasán prátika oioin bele rai no monta iha laran, ezemplu: besi badain, mikroskópiu, exibitu ki’ikoan, modelu sistema isin nian, modelu jeolójia, kímika no astronomia, hamutuk ho materiál uzadu oioin ne’ebé bele uza halo prátika.

Se fatin loos seidauk iha, bele hahú ho fatin temporáriu, depois rehabilita fatin ida hodi muda ba.  KP tenke loke ba mestre/a hotu-hotu iha munisípiu laran, kualkér nivel, ne’ebé iha interese halo prátika no aprende siénsia no matemátika.  Mestre/a hotu bele involve iha laran, no mestre/a sira bele mós lori sira-nia estudante atu asesu ba fatin KP.

3. Diseminasaun Informasaun Kona-Ba Unesco Global Geopark
Geopark nu’udar konseitu inovativu Ida husi Dezenvolvimentu Sustentavel ne’ebé aplika ba territóriu ka area sira ne’ebé iha valor patrimóniu jeolójika Global (Geoheritage). Geopark sai hanesan sigla Ida ne’ebé mai husi lian ingles ho nia signifikadu “Geological Park” katak Jardín Jeolójika ka Jardín Mundu Raiklaran nian. Territóriu ka área sira-ne’ebé nakonu ho rekursu jeolójika oioin hanesan mineral, fatuk, fossil, estrutura jeolójia no paizajen ne’ebé iha valor estétika global (outstanding) inklui mós aspetu arkeolójiku, ekolójiku (flora, fauna, ekosistema) no mós kultura (hanesan patrimóniu tradisionál husi ita nia bei’ala sira), iha vantajen boot atu sai nu’udar Geopark ida. Iha parte seluk, autoridade lokál hamutuk ho komunidade lokál mak kaer papél importante ne’e ho ativu hodi proteje no dezenvolve funsionamentu Patrimóniu natural-sira ne’e.

4. Treinamento Astronomia
Estudante sira, professor sira no komunidade Timor-Leste foin lalais ne’e observa total eklipse solar no eklipse lunar iha Timor-Leste. Fenómenu ne’e fo impaktu boot ba ita nia komunidade sira, espesiál ba ita nian estudante sira; ne’e hasa’e sira ninian hakarak hatene kona ba fenómenu ne’e. Komentáriu barak no argumentu barak ne’ebé fahe no debate antes total eklipse solar iha 20 Abríl 2023. Antes eklipse akontese, ema barak la fiar ida ne’e sei akontese. Ikus mai, sira haree no observa rasik. Ekipa SESIM serbisu maka’as hodi fahe informasaun hotu relasaun eklipse solar ho nia staff Knua Prátika no estudante sira.

Ekipa SESIM sei servisu ho ITERA, espesiál iha area astronomia, ho nia benefísiu bele fahe istória; Universidade Nasionál Timor Lorosa’e (UNTL) husi departamentu fízika; komunidade siénsia workshop husi Salinas, California, USA; Instituto Nacional de Formação de Docentes e Profissionais de Educação (INFORDEPE); no diretór edukasaun munisipiu. Ekipa ITERA no SESIM sei servisu hodi kria matéria aprendizajen ho konseitu jerál astronomia, meteorolojia, ekipamentu navegasaun hanesan GPS, Sextant, sky observation (observasaun lalehan) uza teleskópiu no introduz uza aplikasaun android seluk; SKY-MAP, nst. Ekipa SESIM sei tradús material sira ba iha lian lokál no halo konesaun ho kurríkulu nasionál, halo barak treinamentu, fó material aprendizajen, no mós hasa’e atividade kada Knua Prátika depois workshop.