Komisaun Nasionál Timor-Leste ba UNESCO (KNTLU) servisu hamutuk ho Ministériu Agrikultura, Pekuaria, Peska no Floresta liu husi servisu Sekretaria Estadu ba Floresta hala’o enkontru ida hodi Estabelese Komité Nasionál Man and the Biosphere (MAB) Timor-Leste.
Bazeia husi enkontru ho entidade hotu ne’ebé hala’o iha tinan kotuk loron 16 Dezembru 2019 no workshop iha loron 9 Agustu 2024, konkorda hodi estabelese Komité Nasionál Man and the Biosphere iha Timor-Leste. Liu husi konsensu husi estrutura no membru komité deside hodi formaliza komité ne’e iha loron (27/05/2025), no komité ne’e konstitui direta husi Governu Timor-Leste liu husi Ministériu Agrikultura, Pekuaria, Peska no Floresta, liu-liu Sekretaria Estadu ba Floresta mak iha responsabilidade másimu ba atividade floresta nian hodi sai nu’udar pontu fokál ba programa MAB.
Komité MAB ne’e rasik sei halo monitór no jere implementasaun programa UNESCO MAB iha Timor-Leste. Programa MAB nu’udar programa siénsia inter-governamentál ida ne’ebé promove agenda kona-ba peskiza inter-dixiplinár no kapasitasaun.
Iha atividade enkontru ida ne’e Sua Exelénsia Sekretaria Estadu ba Floresta hateten enkontru ida ne’e atu bele elabora estrutura komité MAB nasionál hodi bele servisu makas kompleta dokumentus hirak ne’ebé atu bele prienxe rekezitu, Komité prepara ona dokumentus atinji ba 95% hodi submete dokumentus ba rejistu Parke Nasionál Nino Konis Santana iha nivel internasionál UNESCO Paris hodi Eleva tan estatutu Parke Nasionál Nino Konis Santana rekoñese iha mundu internasionál.
Atividade estabele Komite MAB iha asina Deklarasaun Entendimentu akordu servisu entre linhas ministeriais, Agency internasionál no NGO lokal sira. reprezenta entidade hirak tuir mai mak hanesan Diresaun Jerál Floresta, Diresaun Jerál Peska, Aquicultura no Jestaun ba Rekursu Akuátiku, Diresaun Jerál Ensinu Superior no Siensia, Diresaun Jerál Turizmu, Diresaun Jerál Ambiente, Diresaun Jerál Arte no Kultura, Diresaun Jerál Habitasaun no Urbanizmu, Diresaun Jerál Desentralizasaun no Governu Lokál, Komisaun Nasionál Timor-Leste ba UNESCO, Instituto Nacional de Ciência e Tecnologia – INCT, Universidade Timor Oriental – UNITAL, Perma-Kultura Timor-Leste, Haburas, UNESCO Antenna Office no United Nation Development Program – UNDP.
