RAEOA, 15 Outubru 2024. Primeiro Ministru Interinu, Eng. Mariano Sabino Assanami hamutuk Sekretáriu Estadu ba Arte no Kultura ho akompañamentu autoriedade sira hosi NTT, Indonesia no Timor-Leste halo lansamentu ba Relatoriu Periódiku Kuadreliniál – QPR 2024, kona-ba Protesaun no Promosaun ba Diversidade Expresaun Kulturál no Livru: Penguatan Budaya dan Rekonsiliasi: Strategi Membangun Persatuan; iha ámbitu Festival Fronteira 2024, iha Hotel Oeupu RAEO.
Lansamentu ba relatóriu rua ne’e realiza iha semináriu ho tema “Rekonsiliasaun no Futuru – Dalan ba Sustentabilidade, Amizade no Paz ne’ebé organiza hosi Centro Nacional Chega, IP no Sekretaria Estadu ba Arte no Kultura.
Iha introdusaun ba lansamentu livru QPR, Sekretáriu Estadu ba Arte no Kultura, Sr. Jorge Soares Cristóvão hateten “QPR 2024 nu’udar relatóriu ida ne’ebé estadu Timor-Leste hato’o ba UNESCO kada tinan 4 hodi relata kona-ba polítika no medida sira ba Protesaun no Promosaun ba Diversidade Expresaun Kulturál”. Membru governu ne’e salienta mós katak “Festival Fronteira hanesan atinjimentu bo’ot ida ba governu Timor-Leste iha implementasaun Konvensau UNESC0 2005; eventu ne’e kria espasu ba mobilidade artista no profesional kultura hosi Indonésia no Timor-Leste no mós halo promosaun ba indústria kriativa Timor-Leste nian.
Partisipa iha lansamentu ba livru ne’e partisipante sira hosi Indonesia no Timor-Leste ne’ebé hola parte iha Festival Fronteira 2024, mak hanesan akadémiku, ativista, artista, estudante, no komunidade sira.
