AJÉNSIA TIC TIMOR I.P ASINA MoU HO KNTLU BA SERVISU INFORMÁTIKA
VIII Governu Konstitusionál liu husi Ajénsia Tecnologia da Informação e Comunicação (TIC) TIMOR I.P, asina Nota Entendimentu sigla Inglés (MoU) ba kooperasaun ho Komisaun Nasional Timor-Leste ba UNESCO (KNTLU), hodi servisu hamutuk iha área informátika. Nota Entendimentu ne’ebé asina, sei kobre apoiu servisu báziku sira hanesan, dezenvolvimentu portal website, hosting no servisu email sira hodi fasilita servisu KNTLU iha sistema informasaun.
Bazeia ba dekretu lei númeru 29/ 2017, Ajénsia TIC TIMOR I.P harii ho nia papél atu implementa polítika liga ba Teknolojia Informasaun no Komunikasaun (TIK) hodi prepara teknolojia ne’ebé ótimu inklui aplikasaun, infraestrutura nomós polítika informátika bazeia prioridade nasionál.
Iha serimónia asina nota entendimentu ne’e, Diretór Ezekutivu Ajénsia TIC TIMOR I.P, Roberto Caitano de Sousa Vicente, iha nia intervensaun katak, kooperasaun ne’ebé agora halo dadauk halo, fó tulun ba KNTLU ba servisu báziku sira hanesan, kriasaun ba website, email ofisial, hosting no seluk tan tanba barak instituisaun estadu sira sei kontinua gasta osan ba servisu báziku sira hanesan website no email.
“Kooperasaun ne’ebé agora dadauk halo KNTLU ne’e hanesan mós ba instituisaun estadu sira seluk. Ajénsia TIC TIMOR hanesan Ajénsia ne’ebé hola parte husi Governu ida ne’e hodi fó servisu sira ne’e gratuita no ida ne’e bele ajuda instituisaun estadu sira hanesan KNTLU bele publika sira nia informasaun no servisu tomak ba públiku,” informa Xefe Ezekutivu.
TIC TIMOR mós hato’o apresiasaun boot ba KNTL ba servisu hamutuk ida ne’e, ne’ebé hatudu duni katak, hanesan instituisaun públika tau mós konsiderasaun liu husi TIC TIMOR ba utilizasaun teknolojia informasaun no komunikasaun hanesan iha parte importante hodi suporta servisu ho di’ak liu tan liu husi utilizasaun email, website, no seluk-seluk tan.
Nia dehan, KNTL nia papél importante loos mai TIC TIMOR hodi kontinua sai hanesan parseiru estratéjiku ba implementasaun planu Governu-Eletróniku ida ne’e. Liu husi KNTLU ho instituisaun estadu sira nia partisipasaun ativa iha esforsu ida ne’e, bele kontribui atu haluan Ajénsia nia servisu ba instituisaun estadu sira seluk ida no ba Governu iha jerál.
Iha fatin hanesan Sekretáriu Ezekutivu KNTLU Francisco Barreto hatete, kooperasaun entre TIC TIMOR ho KNTLU hanesan, amizade ne’ebé di’ak tebes no ida ne’e, hanesan mahon ida ba TIC TIMOR , ne’ebé fornese apoiu ba instituisaun públiku sira hanesan mós KNTLU ne’ebé tutela iha MESCC tanba ne’e, nota entendimentu ida ne’e atu apoiu KNTLU nia atividade tomak ba públiku atu asesu tanba durante ne’e, KNTLU iha atividade barak maibé, informasaun barak maka seidauk to’o iha komunidade sira.
Tanba ne’e, liu husi akordu ida ne’e, estabelese website ofisial ida atu fornese informasaun ne’ebé pozitivu no kredibilidade ba komunidade sira atu asesu programa ne’ebé maka iha KNTLU.
Nota Entendimentu ne’e, asina direta husi Diretór Ezekutivu TIC TIMOR I.P, Roberto Caitano de Sousa Vicente ho Sekretáriu Ezekutivu KNTLU, Francisco Barreto.
Entretantu biban ne’e mós asina Service Level Agreement (SLA) ba website nian, ne’ebé asina husi Diretór Divizaun Aplikasaun, Justo Fernandes ho Koordenadór Komunikasaun no Informasaun KNTLU Clementino Pinto Amaral no SLA ba Email Ofisial asina husi Diretór Divizaun Infraestrutura, André Felix Marques ho Koordenadór Komunikasaun no Informasaun KNTLU Clementino Pinto Amaral. #MÉDIA TIC#
