Timor-Leste sai nu’udar Estadu Parte ba dala 193 ba Konvensaun Patrimóniu Mundiál UNESCO nian iha loron 31 Janeiru 2017. Ratifika ona Konvensaun ne’e, Timor-Leste hamutuk ho komunidade boot internasionál ne’ebé iha kompromisu atu garante identifikasaun, protesaun, konservasaun, aprezentasaun no transmisaun ba jerasaun futuru patrimóniu kulturál no naturál ne’ebé situa iha ninia territóriu. Desde Timor-Leste ratifika konvnesaun ne’e, seidauk iha estratéjia ka planu asaun ida iha nível nasionál ba Implementasaun Konvensaun Patrimóniu Mundiál nian.
Ho nune’e, Komisaun Nasionál Timor-Leste ba UNESCO (KNTLU), no UNESCO Jakarta servisu hamutuk ho Ministériu Juventude Desportu Arte no Kultura, Ministériu Turismu no Meiu Ambiente realiza ona workshop iha loron 3 to’o loron 5 fulan Dezembru iha Dili. Workshop nee realiza ho fasilitasaun hosi péritu Internasionál ida ba World Heritage Konvensaun Dr. Daud Aris Tanudirjo. Workshop ne’e realiza iha salun Dalan ba Dame-KRAM-MJDAC ho objetivu Atu hasa’e kapasidade instituisaun relevante sira estadu nian hodi hala’o identifikasaun ba Patrimóniu Kulturál iha rai laran ho Valor Universál Esepsionál hodi halo nomeasaun ba iha lista tentativa Patrimóniu Mundiál UNESCO nian.
Iha workshop nee hetan partisipasaun máximu hosi potu fokál sira hosi: Sekretária Estadu ba Arte no Kultura-Ministériu Juventude, Desportu, Arte no Kultura (SEAC-MJDAC), Ministériu Turizmu no Ambiente (MTA), Autoridade Nasionál Minerais (ANM), Instutu Nasionál Siénsia no Tecnolojia (INCT), no parseiru dezenvolvimentu sira hanesan Fundasaun Alola no Timor Aid. Ida nee mak workshop dahuluk ba kapasitasaun dezenvolvimentu lista tentativa patrimóniu mundiál nian no sei iha workshop daruak ne’ebé sei hala’o iha fulan Marsu tinan 2025 hodi halo preparasaun dossier ba nomeasaun Propriedade Kultural Timor-Leste nian ba iha lista tentativa Patrmóniu Mundial UNESCO iha tinan 2025.
