Iha tinan 1992 UNESCO estabelese programa ida ba Memória Mundu nian. Programa ne’e sai nu’udar Objetivu atu hodi sensibiliza ba Nivel Mundial konaba Ezisténsia no Signifikadu hosi patrimóniu dokumentál, hodi fasilita nia prezervasaun liu hosi téknika sira ne’ebé apropriadu liu, no hodi promove asesu universál ba patrimóniu ida ne’e.
Ekipa divizaun Komunikasaun no Informasaun hosi Komisaun Nasionál Timor Leste ba UNESCO (KNTLU) servisu hamutuk Ministériu Edukasaun (ME) kontinua halao’o Semináriu kona ba Promove no Salvaguarda Patrimóniu Mundial Dokumentál hodi registu iha Memória do Mundo iha postu administrativu Balibo munisípiu Bobonaro.
Semináriu ida ne’e hanesan atu partilla informasaun ba komunidade sira no hasae koñesimentu kle’an liutan kona ba Salvaguarda Patrimóniu Mundial Dokumentál hanesan dokumental fotografia, audiovisual, textu no sira seluk tan ne’ebé iha ona desde avo beala sira nia tempu persija prezerva sasán antigu hirak ne’e no transforma ba digitalizasaun atu nune’e bela salva hosi dezastre ruma no sei sai hanesan memória ida ba jerasaun foun sira hodi bele hare no asesu.
Reprezentante Administrador postu administrativu Balibo Sr. Mateus Maia hateten semináriu ida ne’e importante tebes ba komunidade sira iha Balibo atu nune’e bele hasae koñesimentu kle’an liu tan kona ba Salvaguarda Patrimóniu Mundial Dokumentál no importante tebes bele rai ita nia dokumental ba registu memória do mundo, agradese no obrigado ba Komisaun Nasionál Timor-Leste ba UNESCO (KNTLU) ho Ministériu Edukasaun (ME) bele realiza ona semináriu ida ne’e.
Objetivu hosi atividade ida ne’e atu partilla informasaun kona ba Salvaguarda Patrimóniu Mundial Dokumentál persija Prezerva dokumentus Heransa nian hanesan sasán antigu sira ne’ebé iha postu administrativu Balibo nian no Promove asesu dokumentus heransa ba asesu universal, atividade ne’e hetan partisipa hosi komunidade no autoridade lokál sira.
